Capacent spáir snjókomu í júní

Skin milli skúra?

Verðbólgan lúrir áfram í 2,3%: Ef verðbólguspá Capacent gengur eftir mun vísitala neysluverðs hækka um 0,24% í maí. Verðbólgan mun því vera óbreytt í 2,3%.

Frostkalt vor: Það er búið að vera frostkalt vor og margir spá snjókomu í júní. Verð gistingar mun ekki hækka mikið frekar en hitastigið úti. Gisting lækkaði í verði í síðasta mánuði og gerir Capacent ráð fyrir óbreyttu verði gistingar og örlítilli hækkun á veitingum.

Welcome to Iceland: Olíuverð hækkar, eftirspurn eftir flugsætum á heimsvísu dregst saman, sætanýting flugfélaga versnar. Fátt er til ráða annað en að lækka verð. Lausleg könnun Capacent bendir til þess að þetta sé raunin og flugfargjöld hafi lækkað í maí. Spá Capacent gerir ráð fyrir 5% lækkun flugfargjalda sem hefur 0,07% áhrif á vnv til lækkunar.

Olíuverð að verða komið á kunnuglegar slóðir: Heimsmarkaðsverð á olíu var í kringum 110 dollara tunnan frá vormánuðum 2011 til haustmánaða 2014. Heimsmarkaðsverð á olíu hríðféll og var verð á olíu í kringum 50 dollarar tunnan þangað til síðasta haust. Heimsmarkaðsverð á olíu hefur hækkað nær stanslaust síðan og er verð á hráolíutunnu komið upp í um 77 dollara. Á sama tíma hefur bensín lítrinn hækkað úr um 195 kr. lítrann í 220 kr. lítrann á Íslandi. Eldsneytisverð hefur hækkað skarpt hér heima síðastliðinn mánuð og gerir Capacent ráð fyrri um 3% hækkun á verði eldsneytis sem hefur 0,1% áhrif á vnv til hækkunar.

Mikil velta á fasteignamarkaði: Velta á fasteignamarkaði hefur aukist mikið með hækkandi sól bæði á höfuðborgarsvæðinu og landsbyggðinni. Mikil velta er oftast vísbending um lífleg viðskipti og umtalsverðar hækkanir. Capacent gerir því ráð fyrir nokkuð hraustlegri hækkun fasteignaverðs eða 0,75% sem jafngildir rúmlega 9% hækkun fasteignaverðs á ársgrunni. Samtals mun fasteignaliður vísitölunnar leggja 0,18% til hækkunar vnv. skv. spá Capacent.

Tollalækkun og gengisveiking: Capacent gerir ráð fyrir örlítilli hækkun á matvælum. Gengi krónunnar hefur veikst lítillega síðustu vikur en á móti munu fyrstu áhrif tollalækkana koma fram um miðjan maí. Tollar munu falla niður á súkkulaði, pizzum, pasta og bökunarvörum og verða lækkaðir á frönskum kartöflum og villibráð o.fl.  Capacent gerir ráð fyrir lítilsháttar hækkun á verði húsgagna og raftækja en að verð fatnaðar standi í stað í maí eftir að hafa hækkað síðustu mánuði. Þær litlu hækkanir sem eru á þessu liðum er vegna kostnaðarverðshækkana en verð allra þessara vara er lægra en fyrir um ári síðan.

Skoða greiningu →