HFF24, ég er dúndur ég er diskó

Árið fór rólega af stað á skuldabréfamarkaði: Litlar breytingar voru á ávöxtunarkröfum skuldabréfa fyrstu vikuna í janúar. Gengi óverðtryggðra ríkisbréfa lækkaði lítillega eða um 0,13% að meðaltali. Gengi verðtryggðra húsbréfa var óbreytt ef undanskilið er HFF24 en gengi bréfsins hækkaði um 0,1%.

HFF24, ég er dúndur ég er diskó… Ávöxtunarkrafa HFF24 nálgast alltaf meir og meir ávöxtunarkröfu lengri íbúðabréfanna HFF34 og HFF44. Munur ávöxtunarkröfu HFF24 og HFF34 er nú aðeins um 20 punktar en var rúmlega 70 punktar síðasta sumar. Að mati Capacent var það alltof mikill munur en ávöxtunarkrafa HFF24 ætti að vera lægri en löngu verðtryggðu skuldabréfanna HFF34 og HFF44. Ástæða þess er sú að minni áhætta felst í að fjárfesta til skamms tíma en langs tíma. Líftími HFF24 er nú 6 ár og ávöxtunarkrafa 2,15%. Verðtryggðir innlánsreikningar innlánsstofnana til 3 og 4 ára bera verðtryggða vexti sem eru um 1,7%.

Ársáætlun Lánamála: Lánamál Ríkisins birtu í lok síðasta árs áætlun um útgáfu ríkisskuldabréfa árið 2018. Lánamál áætla að gefa út ríkisbréf fyrir 40 milljarða króna árið 2018. Útgáfan verður fyrst og fremst í flokkunum RIKB28 og RIKB22.

Þrýstingur á ávöxtunarkröfu til lækkunar í haust? Í október á þessu ári verður skuldabréfaflokkurinn RIKH18 á gjaldaga en andvirði flokksins er um 70 milljarðar króna. Flokkurinn var gefinn út til að fjármagna kaup ríkisins á viðskiptabönkunum. Flokkurinn er að stórum hluta í eigu fjármálafyrirtækja og verðbréfasjóða. Líklegt er að í kjölfar þess að flokkurinn fer á gjalddaga skapist umtalsverð eftirspurn eftir ríkisbréfum og þá sérstaklega skammtíma ríkisbréfum.

Samtals mun lántaka ríkisins vera neikvæð um 39 milljarða króna árið 2017. Auk þess sem RIKH18 er á gjalddaga er afborgun á skuldabréfi að fjárhæð 7 ma.kr. sem var gefið út vegna kaupa á hlut Reykjavíkurborgar í Landsvirkjun. Aðrar afborganir nema 2 milljörðum króna.